Jana Sena ఇద్దరు కంసులతో పోరాడుతోంది: పవన్
Spread the love

తానెప్పుడూ సమాజం కోసమే కలలు కన్నానని, జగన్‌లా వేల కోట్లు దోచుకోవాలని, ముఖ్యమంత్రి కావాలని కలలు కనలేదని పవన్ సెటైర్ వేశారు. తండ్రి అధికారాన్ని అడ్డం పెట్టుకుని ప్రజాధనాన్ని దోచుకున్న జగన్‌ ఐఏఎస్ అధికారులను కూడా జైలుకు పంపారని విమర్శించారు.

ఐదేళ్ల వయస్సున్న జనసేన పార్టీ ఇద్దరు కంసులతో పోరాడుతోందని ఆ పార్టీ అధినేత పవన్‌కళ్యాణ్అన్నారు. రాష్ట్రంలో కరడుగట్టిన తెలుగుదేశం పార్టీ, ఫ్యాక్షన్ పార్టీ అయిన వైసీపీతో తాము ఢీకొంటున్నామని అన్నారు. ఎన్నికల ప్రచారంలో భాగంగా పశ్చిమగోదావరి జిల్లా పాలకొల్లులో మంగళవారం ఆయన పర్యటించారు. ఈ సందర్భంగా మాట్లాడుతూ.. చంద్రబాబు టీడీపీని ఎన్టీఆర్ నుంచి లాక్కున్నారని, జగన్ వైసీపీని డబ్బిచ్చి కొనుక్కున్నారని, జనసేన మాత్రం ప్రజాసమస్యలపై ప్రశ్నించడానికి పుట్టిందని అన్నారు.

తానెప్పుడూ సమాజం కోసమే కలలు కన్నానని, జగన్‌లా వేల కోట్లు దోచుకోవాలని, ముఖ్యమంత్రి కావాలని కలలు కనలేదని పవన్ సెటైర్ వేశారు. తండ్రి అధికారాన్ని అడ్డం పెట్టుకుని ప్రజాధనాన్ని దోచుకున్న జగన్‌ ఐఏఎస్ అధికారులను కూడా జైలుకు పంపారని విమర్శించారు. కిరాయిమూకలు నడిపించేవారు, భూకబ్జాలు చేసేవారు, పవిత్ర పుణ్యక్షేత్రం తిరుమలలో చెప్పులేసుకుని నడిచేవారు వైసీపీలో చేరుతున్నారని ఆరోపించారు. తనను కొందరు స్నేహం ముసుగులో తన పంచన చేరి అవసరం తీరాక మోసం చేశారని అన్నారు.

కనీసం అవతరణ దినోత్సం కూడా జరుపుకోలేని దౌర్భాగ్యస్థితిలో ఆంధ్రప్రదేశ్ ఉందని పవన్ ఆవేదన వ్యక్తం చేశారు. జనసేన ప్రభుత్వం వస్తే పొట్టిశ్రీరాములు జయంతి రోజును అవతరణ దినంగా ప్రకటిస్తామన్నారు. దొడ్డిదారిన ఎమ్మెల్సీ అయిన లోకేశ్‌ కూడా పెన్షన్ తీసుకునేటప్పుడు రైతులకు ఎందుకు పెన్షన్ ఇవ్వకూడదని ప్రశ్నించారు. అందుకే తాము అధికారంలోకి వస్తే 60ఏళ్లు దాటిన ప్రతి రైతుకు నెలకు రూ.5వేల పెన్షన్ ఇస్తామన్నారు. టీడీపీ నేతలకు రైతులపై గౌరవం లేదని, విద్యుత్ చార్జీలు తగ్గించాలని బషీర్‌బాగ్‌లో ధర్నా చేసిన రైతులను కాల్చి చంపిన చరిత్ర టీడీపీ ప్రభుత్వానిదని పవన్ ఆరోపించారు.