సీతమ్మ కి మరోసారి అగ్ని పరీక్ష !!
Spread the love

సీతకు శ్రీరాముడు అగ్ని పరీక్ష నిర్వహించినట్టే గానే తన కోడలు శీలంపై అనుమానం పెంచుకున్న ఓ అత్త ఆమె రెండు చేతులకు వాతలు పెట్టింది. దారుణమైన ఈ ఘటన ఉత్తర్‌ప్రదేశ్‌లో చోటుచేసుకుంది. అయితే పోలీసులు తెలిపిన వివరాల ప్రకారం… యూపీలోని మథురకు చెందిన బాధిత మహిళ సుమనీకి జయవీర్‌తో గతేడాది ఏప్రిల్‌లో వివాహం జరిగింది. అదే రోజున సుమనీ సోదరి పుష్పకు, జయవీర్ తమ్ముడు యశ్‌వీర్‌కు ఇచ్చి వివాహం జరిపించారు. ఒకే ఇంటికి కోడళ్లుగా వెళ్లిన సుమనీ, పుష్పలకు ఆరు నెలల తర్వాత వేధింపులు మొదలయ్యాయి. సుమనీ ప్రవర్తన మంచిది కాదంటూ అత్త ఆమె శీలాన్ని అనుమానిస్తూ తరచూ వేధింపులకు పాల్పడేది. దీంతో ఓ తాంత్రికుడి సలహాతో ఆమెకు అగ్ని పరీక్ష పెట్టాలని నిర్ణయించింది. కోడలు రెండు అరచేతులపై కర్రుతో కల్చి తీవ్రంగా గాయపర్చింది. అయితే దీనిపై బాధితురాలు మాట్లాడుతూ…. అత్తమామలు తనపై దాడిచేసి, నువ్వు ఓ మోసగత్తెవంటూ తన శీలాన్ని శంకించారని వాపోయింది. తనను శారీరకంగా హింసించడమే కాదు, అదనపు కట్నం కోసం వేధించారని కన్నీళ్లు పెట్టుకుంది. అంతేకాదు భర్త జయవీర్ కూడా తనను హింసించినట్టు తెలిపింది. ఒక రోజు నిద్రపోతున్న తనపై కత్తితో దాడిచేసి గాయపరిచాడని పేర్కొంది. తాను మోసం చేశానని ఆరోపిస్తూ చంపుతానని బెదిరించాడని బాధితురాలు వెల్లడించింది. ఈ ఘటనపై తన తండ్రితో కలిసి పోలీసులకు ఫిర్యాదు చేస్తే ఇరు కుటుంబాలను పిలిపించి సర్దిచెప్పి పంపేశారని తెలియజేసింది. తాజాగా అత్తగారు, మరో ఆరుగురితో కలిసి తన చేతులకు నిప్పంటించి, తీవ్రంగా హింసించారని పోలీసులకు ఫిర్యాదు చేసింది. బాధితురాలి ఫిర్యాదుతో కేసు నమోదుచేసిన పోలీసులు, అత్తింటివారిని అదుపులోకి తీసుకున్నారని తెలుస్తుంది