భార్యకు కేన్సర్… ఆమె కోసం భర్త ఏం చేశాడో తెలుసా?
Spread the love

ప్రేమంటే ఇద్దరు మనుషుల పరిచయం మాత్రమే కాదు రెండు మనసులు కలిసి చేసే ప్రయాణం. ఆ ప్రయాణంలో ఎంతటి కష్టం ఎదురైనా ఒకరికొకరు తోడుగా ఉన్నప్పుడు మాత్రమే ఆ ప్రేమ పవిత్ర బంధంగా కలకాలం వర్ధిల్లుతుంది. ఒక ప్రేమ జంట కొన్నేళ్ళపాటు ప్రేమించుకుని ఆ తర్వాత పెళ్లి చేసుకున్నారు. ఇంతలో భార్యకు కేన్సర్ అని తెలిసింది. ఆ భర్త గుండె ఆగిపోయినంత పని అయింది. కానీ, ధైర్యం కోల్పోలేదు. భార్య కోసం ప్రాణాలు సైతం ఇచ్చేందుకు సిద్ధపడ్డాడు. భార్య కోసం ఎంతటి కష్టాన్నైనా ఎదుర్కోవాలన్న నిర్ణయానికి వచ్చాడు. అంతే… నిజమైన ప్రేమంటే ఏంటో నిరూపించాడు.

ఇక వివరాలలోకి వెళితే…. కేరళలోని త్రిసూరుకు చెందిన షాన్ ఇబ్రహిం బాద్షా, శ్రుతి కాలేజీ రోజుల్లో ప్రేమించుకున్నారు. పెద్దలను ఒప్పించి పెళ్లి చేసుకున్నారు. అయితే పెళ్లి జరిగిన కొన్ని రోజులకే శ్రుతి అనారోగ్యం బారిన పడటంతో ఆమెను ఆసుపత్రికి తరలించారు. వైద్యులు శ్రుతి ఆరోగ్యానికి సంబంధించి ఓ భయంకర నిజాన్ని వెల్లడించారు. శ్రుతికి క్యాన్సర్ ఉందని చెప్పడంతో రెండు కుటుంబాలు తీవ్ర ఆందోళనకు లోనయ్యాయి. ప్రాణానికి ప్రాణంగా ప్రేమించి పెళ్లి చేసుకున్న తన భార్యకు క్యాన్సర్ ఉందన్న విషయం తెలిసి షాన్ తట్టుకోలేకపోయాడు. గుండెలవిసేలా రోదించాడు. అయితే.. ఆమెను ఎలాగైనా బతికించుకోవాలన్న షాన్ సంకల్పమే శ్రుతికి ఊపిరి పోసింది.

శ్రుతికి క్యాన్సర్ చికిత్సలో భాగంగా కీమోథెరపీ మొదలుపెట్టారు. ఆ చికిత్స ప్రభావంతో శ్రుతి జుట్టు ఊడిపోయింది. ఆ సమయంలోనే షాన్ ఓ కీలక నిర్ణయం తీసుకున్నాడు. తన భార్య ఆ స్థితిలో ఉన్నప్పుడు తనకు మాత్రం జుట్టు ఎందుకనుకున్నాడు. అతను కూడా గుండు చేయించుకున్నాడు. క్యాన్సర్‌తో బాధపడుతున్న శ్రుతికి షాన్ అన్నీతానై అండగా నిలిచాడు. ఇప్పుడు ఆమె క్యాన్సర్ నుంచి కోలుకుంది. వీరి పెళ్లయి సంవత్సరం అయిన సందర్భంగా షాన్ తన ప్రేమకథను గురించి ఫేస్‌బుక్‌లో పోస్ట్ చేశాడు. తాను కష్టాల్లో ఉన్నప్పుడు శ్రుతి తోడుగా నిలిచి భరోసానిచ్చిందని, అలాంటి తన శ్రుతి అనారోగ్యంతో బాధపడుతున్నప్పుడు అండగా నిలవాల్సిన బాధ్యత తనపై ఉందని షాన్ చెప్పాడు. ఇలా షాన్-శ్రుతి ప్రేమకథ వెలుగులోకొచ్చింది.