ఎయిర్ టెల్  పేమెంట్స్ బ్యాంక్ కు మరోసారి షాకిచ్చిన ఆర్బీఐ
Spread the love

ముంబయి: ఎయిర్‌టెల్‌ పేమెంట్స్‌ బ్యాంక్‌కు రిజర్వ్‌ బ్యాంక్‌ ఆఫ్‌ ఇండియా మరో షాకిచ్చింది. ఎయిర్‌టెల్‌ పేమెంట్స్‌ బ్యాంక్‌ కొత్త ఖాతాదారులను చేర్చుకోరాదని ఆర్‌బీఐ స్పష్టం చేసింది.కొత్త కస్టమర్ల రిజిస్ట్రేషన్లను నిలిపివేయాలని ఆదేశించింది. మార్గదర్శకాల ఉల్లంఘన నేపథ్యంలో కంపెనీపై దర్యాప్తు చేస్తున్నందున రిజిస్ట్రేషన్లను నిలిపివేయాలని ఆదేశించినట్లు ఆర్‌బీఐ తెలిపింది.ఆర్‌బీఐ ఆదేశాల ప్రకారం జనవరి 5,2018 నుంచి కొత్త కస్టమర్లను తీసుకోవట్లేదు. ఈ వ్యవహారంలో పూర్తి వివరాలను మేం అధికారులకు అందజేశామని ఎయిర్‌టెల్‌ ప్రతినిధి తెలిపారు.

ఖాతాదారుల నుంచి ఎలాంటి అనుమతి తీసుకోకుండానే ఎయిర్‌టెల్‌ పేమెంట్స్‌ బ్యాంక్‌ వారి ఖాతాలు ప్రారంభించించింది. గత ఏడాది నవంబరు 20-22 తేదీల మధ్య ఆర్‌బీఐ నిర్వహించిన పరిశీలనలో ఈ విషయం తేలింది. ఇలా దాదాపు 30 లక్షల ఖాతాలు తెరిచింది.  ఆధార్‌తో నెంబర్‌ వెరిఫికేషన్‌ చేపట్టిన కస్టమర్లపై ఈ ప్రభావం పడింది. కేవలం ఖాతాలు తెరవడమే కాకుండా.. వంటగ్యాస్‌పై ప్రభుత్వం ఇస్తున్న సబ్సిడీ లబ్ధిదారుల రెగ్యులర్‌ బ్యాంక్‌ ఖాతాల్లో కాకుండా తన పేమెంట్స్‌ బ్యాంకు ఖాతాల్లో జమ చేసుకుంది. దీంతో ఈ వ్యవహారం వెలుగులోకి వచ్చింది.

ఈ విషయం వెలుగులోకి రావడంతో, జనవరి 15న ఎయిర్‌టెల్‌ పేమెంట్స్‌ బ్యాంకుకు రిజర్వ్‌ బ్యాంక్‌ ఆఫ్‌ ఇండియా షోకాజ్‌ నోటీసు జారీ చేసింది. కేంద్ర బ్యాంకు సూచించిన మార్గదర్శకాలు పాటించకుండా.. ఖాతాదారుల అనుమతి లేకుండా ఎందుకు ఖాతాలు తెరిచారో వివరణ ఇవ్వాలని అందులో పేర్కొంది. బ్యాంకు ఇచ్చిన సమాధానం విన్న తరవాత రూ.5 కోట్ల జరిమానా విధించింది.